A Confederación de Empresarios de Galicia (CEG), a través do seu Servizo de Licitacións Internacionais (SALT) e en colaboración co Instituto Galego de Promoción Económica (IGAPE), lanzou un ciclo de talleres formativos en Licitacións Multilaterais para o período 2024-2025. O segundo destes talleres, titulado “Por que se gaña e por que se perde un proxecto?”, tivo lugar o 23 de outubro con formato híbrido: presencialmente no Salón Galicia da CEG en Santiago de Compostela e de maneira en liña a través de TEAMS.

Para a organización deste taller contouse con Scadi Global Consulting Enterprise, S.L., consultora especializada en facilitar a participación de empresas nacionais e internacionais en procesos de contratación e licitacións internacionais, cun enfoque particular nos sistemas de compras da ONU.

A xornada estivo dirixida a todas as empresas do tecido empresarial galego interesadas en ter éxito en convocatorias multilaterais.

O taller puxo o foco entre os tipos distintos de licitacións formais e informais. As primeiras inclúen a invitación para licitar, solicitudes de propostas, acordos marco e contratos chave en man, mentres que as segundas comprenden solicitudes de cotización e compras directas. Tamén se destacan portais web como UNGM e Quantum, que facilitan a interacción entre provedores e organismos internacionais. O uso destes portais é clave para rexistrarse e enviar propostas de maneira eficiente.

Así mesmo, abordáronse os erros máis comúns nas licitacións dividíndoos en tres categorías: administrativos, técnicos e económicos. Entre os erros máis comúns destacamos:

• Administrativos: inclúen a entrega tardía de documentos, a falta de avais ou a presentación da oferta no idioma incorrecto.
• Técnicos: é común que as empresas non axusten os perfís dos seus expertos ou non comprendan ben os termos de referencia do proxecto.
• Económicos: destacan os erros aritméticos e a falta de separación das propostas técnicas e financeiras.

Respecto a a valoración das propostas, os criterios van máis aló do prezo máis baixo. #Priorizar a pertinencia das referencias, a calidade dos expertos propostos e a comprensión do proxecto por parte da empresa. Unha proposta sólida debe demostrar solvencia financeira, técnica e humana, así como a capacidade de cumprir cos obxectivos do proxecto.

Recoméndase coidar a forma e estrutura da proposta para facilitar a súa avaliación, incluíndo un resumo claro do consorcio ou empresa, destacando as ideas principais, e utilizando un enfoque visual para representar os obxectivos do proxecto. En termos técnicos, débese incluír indicadores claros e resaltar a experiencia do equipo. Finalmente, desde o punto de vista económico, é fundamental separar a oferta financeira do resto da documentación e seguir un enfoque proactivo se hai dúbidas sobre o formato.Esta xornada de formación técnica en licitacións multilaterais que a CEG organizou supuxo unha excelente oportunidade para que as empresas galegas obteñan coñecementos e ferramentas para presentarse a licitacións internacionais con maiores posibilidades de éxito. Se queres estar ao tanto da celebración de futuros talleres rexístrache na nosa plataforma web SALT e poñerémonos en contacto contigo!