A Confederación de Empresarios de Galicia (CEG), a través do seu Servizo de Licitacións Internacionais (SALT) e en colaboración co Instituto Galego de Promoción Económica (IGAPE), segue impulsando a formación das empresas galegas en Licitacións Multilaterais durante o ano 2025. Neste marco, o cuarto destes talleres, titulado “O contrato de adxudicación e a súa execución. Aspectos técnicos e económicos a considerar”, celebrouse o mércores 2 de abril con formato híbrido: presencialmente no Salón Galicia da CEG en Santiago de Compostela e de maneira en liña a través de TEAMS.

Para a organización deste taller contouse con Karine Brück International, consultora especializada en facilitar a participación de empresas nacionais e internacionais en procesos de contratación e licitacións internacionais.

O taller enfocouse nas fases do proceso de adxudicación e execución contractual en proxectos multilaterais, destacando aspectos fundamentais como a planificación e xestión do contrato, a xestión de modificacións e continxencias, así como a avaliación de casos prácticos.

Durante a xornada, abordáronse os principais criterios empregados polos organismos multilaterais na adxudicación de contratos, subliñando a importancia da transparencia e a equidade nestes procesos. Fíxose unha revisión dos documentos requiridos para a adxudicación, incluíndo a xestión de avais. Ademais, detalláronse as características fundamentais dos contratos, incluíndo as súas obrigacións legais e a necesidade de cumprir estritamente cos termos económicos establecidos.

Tamén se estudaron os mecanismos de seguimento e control durante a execución do contrato, abarcando fitos clave, verificación de entregables e cumprimento de requisitos administrativos e técnicos. Fíxose fincapé na importancia do cumprimento de prazos e orzamentos, así como na necesidade de establecer indicadores de control que permitan detectar e corrixir desviacións a tempo.

Outro dos aspectos tratados no taller foi a xestión de continxencias e modificacións contractuais, explorando estratexias para mitigar riscos e garantir a correcta execución dos proxectos sen afectar a súa viabilidade realizando axustes contractuais cando as circunstancias requíreno, asegurando o cumprimento dos termos e evitando penalizacións.

Así mesmo, presentáronse e analizaron casos prácticos baseados en experiencias reais, como atrasos na entrega de produtos dentro de consorcios, erros na facturación e problemas na execución orzamentaria, xunto con estratexias para a súa prevención e solución.

Este último taller, da serie de talleres SALT 2024/25, proporcionou aos asistentes unha guía práctica e detallada para optimizar a xestión de contratos no ámbito multilateral.

Se queres estar ao tanto da celebración de futuros talleres rexístrache na nosa plataforma web SALT e poñerémonos en contacto contigo!